Bezaar Ho chukay hain  is Aashiaan say Ham,
Lo  aaj ja rahay hain teray Gulistaan say Ham.


Bulbul ki Griya-v-zaari nay ukta diya hamain,
Daaman chuda rahay hain Aaho-Figaan say Ham.


Aaya karain Chaman main Bahaarain to kya gharz,
Bas Sair ho chukay hain , Bahaaron-Khizan say ham.


Aakhir phir uski yaad nay tadpa diya hamain ,
Jis ko bhula chukay thay Dil-e-Naatawaan say Ham..


Jis be-wafa kay dar say uthay kha kay thokrain ,
Ab phir milain gay kya ,usi na-mahrbaan say Ham.


Zeray Falak huye hain Sitam kuch na poochiye,
Nalaan Zameen say thay Na kabhi Aasmaan Say Ham.


Dil main hazaar Hasrto-Armaan liye  "SHAMEEM",
Na-shaad-o-Na -Muraad chalay is Jahaan say ham.